வழுக்கு மரத்திலிருந்து கைதவறி வீழ்ந்த வீரர்! புத்தாண்டு விழாவில் சம்பவம்!

சித்திரைப்புத்தாண்டை முன்னிட்டு காரைதீவு விளையாட்டுக்கழகம் நேற்று(15-04-2018) நடாத்திய சித்திரைப்புத்தாண்டு விளையாட்டு விழாவில் வழுக்குமரமேறிய வீரரொருவர் திடீரென கை தவறியதால் எவரும் எதிர்பாராத வகையில் தரையில்வீழந்த சம்பவம் ஒன்று இடம்பெற்றுள்ளது.

இந்த விபத்து சம்பவம் காரைதீவு கனகரெத்தினம் விளையாட்டரங்கில் நேற்று(15) நடைபெற்ற சித்திரைப்புத்தாண்டு கலாசார விளையாட்டுவிழாவில் இடம்பெற்றது.

சுமார் 40அடி உயரமான வழுக்குமரத்தில் ஏறிய சாமித்தம்பி தவராசா(வயது 40) என்பவரே இவ்விதம் பரிதாபகரமாக மல்லாக்க வீழந்து இடுப்பு தரையில் அடிபட வீழ்ந்ததால் பலத்த என்புமுறிவுகள் உள்ளாகியுள்ளாா்.

இச்சம்பவம் பற்றி மேலும் தெரியவருவதாவது.....

விளையாட்டு விழாவில் வழுக்குமரம் ஏறும் நிகழ்வு இடம்பெற்றுக்கொண்டிருந்தபோது சுமார் 30அடி உயரமான குறித்த வழுக்கு மரத்தில் முதலாவதாக தவராசா என்ற நபா் விரைவாக ஏறியுள்ளாா்.

இதன்போது மேலிருந்த கிறீசை வழித்துவிட்டு தான் கட்டிய கயிற்றை பிடித்தபோது கயிறு திடிரென எதிர்பாராதவகையில் அறுந்ததனால் நிலைதடுமாறி கை தவறி கீழே விழுந்துள்ளாா்.

இந்நிலையில் சம்பவ இடத்தில் நின்ற காரைதீவு பிரதேசபைத்தவிசாளர் கிரு. ஜெயசிறில் உடனடியாக
விரைந்து தனது வாகனத்தில் ஏற்றிக்கொண்டு கல்முனை ஆதார வைத்தியசாலையில் அனுமதித்தாா்.

இதன்போது வைத்தியா்கள் விரைந்து செயற்பட்டதால் உயிருக்கு ஆபத்தில்லை என தவிசாளர் ஜெயசிறில் தெரிவித்தார்.

கல்முனை ஆதார வைத்தியசாலை வைத்திய அத்தியட்சகர் டாக்டர் இரா.முரளீஸ்வரனிடம் கேட்டபோது......

குறித்த வீரரை ஸ்கன்செய்த வைத்திய அதிகாரிகள் உயரத்திலிருந்து வீழ்ந்ததனால் இடதுகால் தொடை எலும்பு முற்றாக உடைந்த அதேவேளை ஏனைய என்புகளும் சிறுசிறு உடைவுகள் ஏற்பட்டிருந்ததாகக் குறிப்பிட்டனர்.

பல்முறிவுகள் என்பில் ஏற்பட்ட காரணத்தினால் அவரை என்பு வைத்திய நிபுணர் உள்ள மட்டக்களப்பு போதனா வைத்தியசாலைக்கு மேலதிக சிகிச்சைக்காக அனுப்பிவைத்தோம். அங்கு சத்திரசிகிச்சை செய்வதற்கான ஏற்பாடுகள் நடைபெறுகின்றன.
தலையில் அடிபடவில்லை. இடுப்பும் அதுசார்ந்த பகுதிகளும் இந்த என்பு முறிவுகளுக்கு உள்ளாகியிருக்கின்றன. எனவே உயிருக்கு ஆபத்தில்லை என்றார்.